Corona (COVID-19) Updates

पहिलोपटक नेपालभित्रै एक व्यक्तिबाट अर्को व्यक्तिमा कोरोना सरेको प्रमाणित

काठमाडौं– नेपालमै पहिलोपटक एक व्यक्तिबाट अर्को व्यक्तिमा कोरोना सरेको ‘केस’ फेला परेको छ । यसअघि विदेशबाट आएका व्यक्तिमा मात्रै कोरोना संक्रमण देखिएको थियो ।शनिबार भने कैलालीकी एक ३४ वर्षीया महिलामा कोरोना संक्रमण भेटिएको छ । स्वास्थ्य तथा जनसंख्या मन्त्रालयका अनुसार ती महिला यसअघि कोरोना संक्रमण देखिएका ३४ वर्षीय यवुककी आफन्त हुन् ।

चैत ८ गते दुबईबाट नेपाल आएका युवक स्वास्थ्यमा समस्या देखिएपछि ११ गते धनगढीस्थित सेती प्रादेशिक अस्पताल भर्ना भएका थिए । स्वाब संकलन गरी परीक्षणका लागि राष्ट्रिय जनस्वास्थ्य प्रयोगशालामा पठाइएकोमा नतिजा सकारात्मक (पोजेटिभ) आएको थियो ।सेती प्रादेशिक अस्पतालका एक चिकित्सकका अनुसार ती ३४ वर्षीया युवकबाटै महिलामा पनि कोरोना सरेको हुन सक्छ ।शनिबार मात्रै सुदूरपश्चिम प्रदेशका ३ जनामा कोरोना संक्रमण देखिएपछि नेपालमा संक्रमितको संख्या ९ पुगेको छ ।

मुम्बइबाट फर्किएका कैलालीका २१ वर्षीय र उत्तराखण्डबाट फर्किएका कञ्चनपुरका ४१ वर्षीय पुरूष तथा कैलालीको ३४ वर्षीया महिलामा कोभिड–१९ को सङ्क्रमण देखिएको स्वास्थ्य तथा जनसङ्ख्या मन्त्रालयको इपिडिमियोलोजी तथा रोग नियन्त्रण महाशाखाका निर्देशक डा। वासुदेव पाण्डेले जानकारी दिए ।

स्वास्थ्य तथा जनसंख्या मन्त्रालयका अनुसार तीनै जना ‘नयाँ’ संक्रमितको अहिले धनगढीस्थित सेती प्रादेशिक अस्पतालमा उपचार भइरहेको छ ।नेपालमा पहिलोपटक गत माघ ९ गते चीनबाट नेपाल आएका विद्यार्थीमा कोभिड–१९ को सङ्क्रमण देखिएको थियो । उनी निको भई घर फर्किसकेका छन् । अन्य सङ्क्रमितको भने आइसोसेलनमा राखि उपचार भइरहेको मन्त्रालयले जनाएको छ । (खबरहब)

Related Articles

Back to top button
Close