News

गुजारा चलाउन नसकेपछि जीवन त्याग, तीन छोराछोरीको बिजोक

विराटनगर । मोरङको सुन्दरहरैचा नगरपालिका– १० सुकुम्बासी बस्तीका ४७ वर्षीय अशोक दर्जीले जीवन त्याग गरेका छन् । आफ्नो दैनिकी नचलेपछि बाबुले संसार नै त्यागेको बालबच्चाको दुखेसो छ । मजदुरी गरेर ६ जनाको परिवार पालेका उनले अब जीवन चलाउन सक्ने आधार नै देखेनन् ।

राम्रो कमाइ हुने भन्दै विदेश जान लागेकी श्रीमतीलाई दलालले दिल्ली पुर्‍याए । दिल्ली पुगेको केही दिनपछि लकडाउन सुरु भयो र श्रीमती दिल्लीमै अलपत्र छिन् । निर्माण क्षेत्रमा मजदुरी गर्ने अशोकले पनि काम पाएनन् । आम्दानीको बाटो बन्द भयो, परिवारमा भोकमरी नै लाग्ने स्थिति आयो ।

लकडाउनको पाँच महिना संघर्ष गरेका उनले दुई छोरी र एक छोराको पेट पाल्न घरमा भएको ग्यास सिलिण्डर पनि बेचे । त्यतिञ्जेल पनि काम पाएनन् । अशोकले मंगलबार जीवन त्याग गरेपछि १७ र १५ वर्षकी छोरी र १३ वर्षका छोराको बिचल्ली भएको छ । जेठी छोरीको भने विवाह भइसकेको छ । ‘हामी घरमा पुग्दा छातीमा राख्ने चामल पनि थिएन’ स्थानीय अगुवा कुमार मिजारले भने ‘सहयोग संकलन गरेर लाश परीक्षण पछि दाहसंस्कार गरियो ।’

उनका अनुसार दर्जी केही महिना अघिसम्म ठेला चलाउँथे । तर ठेला बेचेर निर्माण क्षेत्रमा मजदुरीको काम सुरु गरेका उनको काम लकडाउनले रोक्यो । ‘अति विपन्न परिवार थियो, छोराछोरीले मागेर पनि गुजारा गर्नुपर्ने अवस्था आएको रहेछ’ कुमारले भने, ‘घरको अवस्था हेर्दा भोकमारी सहन नसकेर बित्नुभयो जस्तो लाग्छ ।’

दर्जीकी माइली छोरी अपाङ्ग छिन् । तीन छोरी र १३ वर्षीय छोरा बुबाको किरिया बसेका छन् । ‘विदेश जाने भन्दै दिल्ली गएकी आमा (अशोककी श्रीमती) उतै बेखर्ची हुनुहुन्छ’ कुमारले भने, ‘परिवारको विजोग देखेर किरिया खर्चका लागि सहयोग संकलन गरेर उपलब्ध गराएका छौं, अन्य संघ संस्थाले पनि सहयोग गरे ।’

सुन्दरहरैचा नगरपालिका– १० का अध्यक्ष राजेन्द्रबहादुर थापा आर्थिक अवस्था कमजोर भएका कारण जीवन त्यागको बाटो रोजेको हुनसक्ने बताउँछन् । ‘श्रीमती पनि सम्पर्कविहीन हुनुहुँदो रहेछ’ उनले भने ‘ परिवारको आर्थिक अवस्था पनि अन्त्यन्तै कमजोर छ ।’ तर यस्तो अवस्था कसैको नआओस् । समुदायलाई गुहारेपनि बाँच्न सक्ने धेरै आधार छन् उनले भने ।

Related Articles

Back to top button
Close